ഒറ്റപ്പെടൽ [മിനിക്കഥ]
ലിഫ്റ്റിൽ കയറവേ, മറ്റുള്ളവർ കയറുന്നതിനു മുൻപേ അയാൾ വാതിൽ വലിച്ചടയ്ക്കുമായിരുന്നു.
കാരണം, ഏകാന്തത അയാൾക്കിഷ്ടമായിരുന്നു !
ഫ്ളാറ്റിന്റെ വാതിൽ തുറന്ന്, അയൽവക്കക്കാരുടെ ചെറുചിരി തന്നെ തേടിയെത്തുന്നതിനു മുൻപേ, അയാൾ സ്വന്തം ഫ്ലാറ്റിന്റെ വാതിൽ അതിവേഗം അടയ്ക്കുമായിരുന്നു.
കാരണം, ഏകാന്തത ആയിരുന്നു അയാൾക്കിഷ്ടം !
സ്വന്തം ഫ്ലാറ്റിന്റെ ജനലുകൾ അയാൾ ഒരിക്കലും തുറന്നിട്ടിരുന്നില്ല. വലതു സൈഡിലെ മനോഹരമായ സിറ്റ്-ഔട്ട് ഒരിക്കൽ പോലും അയാൾ ഉപേയാഗിച്ചിരുന്നില്ല.
കാരണം, അതിനേക്കാൾ അയാൾക്കിഷ്ടം ഏകാന്തതയായിരുന്നു !
അങ്ങ് ദൂരെ, നാട്ടിൽ നിന്നും വല്ലപ്പോഴുമെങ്കിലും അയാളെ തേടി വന്നിരുന്ന ഒരൊറ്റ ഫോൺകാൾ പോലും അയാൾ എടുത്തിരുന്നില്ല.
കാരണം, ഏകാന്തതയെ ശല്യപ്പെടുത്തുന്നതൊന്നും അയാൾ ഇഷ്ടപ്പെട്ടിരുന്നില്ല !
രാവിലെ ഓഫീസിലേക്കുള്ള യാത്രകളിൽ ഒരിക്കലും, അയാൾ കാറിന്റെ ചില്ലുകൾ താഴ്ത്തിയിരുന്നില്ല.
കാരണം, ഏകാന്തതയോടൊപ്പമുള്ള അയാളുടെ യാത്രകൾ മറ്റുള്ളവർ കാണുന്നത് അയാൾ വെറുത്തിരുന്നു !
ഓഫീസിൽ, അയാളുടെ ക്യാബിൻ എപ്പോഴും അടഞ്ഞു കിടന്നിരുന്നു. അതിനു ചുറ്റുമുള്ള ഗ്ളാസുകളെല്ലാം സൺഫിലിം ഉപയോഗിച്ചു ഭംഗിയായി മറച്ചിരുന്നു.
കാരണം, തന്റെ ഏകാന്തതയെ ആരും ഭഞ്ജിയ്ക്കുന്നത് അയാൾ ഇഷ്ട്പ്പെട്ടിരുന്നില്ല !
കാണാൻ സൗന്ദര്യമുള്ളതോ ഇല്ലാത്തതോ ആയ ഒരു പെൺകുട്ടിയേയും, അയാൾ ശ്രദ്ധിച്ചതേയില്ല.
കാരണം, ഏകാന്തതയോടായിരുന്നു അയാൾക്ക് പ്രേമം !
ഒരു ദിവസം പോലും ഒരു ഭക്ഷണശാലയിലും അയാൾ കയറിയിരുന്നില്ല. പകരം എല്ലായ്‌പോഴും അയാൾ അടുത്ത ഭക്ഷണശാലയിലെ 'ഡോർ ഡെലിവറി' സംവിധാനം ഉപയോഗപ്പെടുത്തിയിരുന്നു.
കാരണം, ഭക്ഷണശാലകളിലെ ആൾത്തിരക്കിനേക്കാൾ അയാൾ ഇഷ്ടപെട്ടത് സ്വന്തം ഫ്ളാറ്റിലെ ഏകാന്തതയും നിശബ്ദതയും ആയിരുന്നു !
ജോലിസ്ഥലത്തോ, താമസ സ്ഥലത്തോ അയാൾക്ക് ഒരൊറ്റ കൂട്ടുകാർ പോലും ഉണ്ടായിരുന്നില്ല.
കാരണം, ഏകാന്തതയായിരുന്നു അയാളുടെ ഏറ്റവും അടുത്ത കൂട്ടുകാരിയും കൂട്ടുകാരനും !
അങ്ങിനെ അങ്ങിനെ ...അയാൾ പതുക്കെ പതുക്കെ യഥാർത്ഥത്തിൽ ഒരു ഏകാന്തപഥികനായി മാറുകയായിരുന്നു.....!
അയാൾ തന്റെ ജീവിതത്തിൽ പരിപൂർണ തൃപ്തനായിരുന്നു.....ഒരേയൊരു പരാതി മാത്രമേ അയാൾക്കുണ്ടായിരുന്നുള്ളൂ. അതുമാത്രമേ തന്റെ പ്രാർത്ഥനകളിൽ അയാൾ ഉൾപ്പെടുത്തിയിരുന്നുമുള്ളൂ.
"ജീവിതത്തിൽ എല്ലാവരും അയാളെ, ഒരു കാരണവുമില്ലാതെ ഒറ്റപ്പെടുത്തുന്നു"; എന്ന് !!
*********
Blog: https://binumonippally.blogspot.com
ചിത്രങ്ങൾക്ക് കടപ്പാട്: ഗൂഗിൾ ഇമേജസ്
Comments
Post a Comment