നവകേരളം [കവിത]

നവകേരളം

[കവിത]

തല കുനിച്ചല്ലേ നടക്കുന്നു ഞാനിന്നു 

കേരളക്കരയിലെ പാതകളിൽ 

എന്തേ ഇതിങ്ങനെ ആയിടുന്നെന്നോർത്തു 

ചിന്തിയ്ക്കയാലല്ലതോർത്തീടണം  

ലജ്ജ കൊണ്ടും, പിന്നെ ഹാനി മൂലം 

എങ്ങോ ഒളിച്ചോരെൻ മാനമാലും 

ശിരസ്സൊന്നുയർത്തുവാൻ ത്രാണിയില്ലാ-

തന്തിച്ചു കുന്തിച്ചു ഞാൻ നടപ്പൂ 

അരുണന്റെ കിരണങ്ങൾ ചോപ്പുചാർത്തേ 

ഭീതിയാണിന്നെന്തു വാർത്തയാവും

മുറ്റത്തു വീണൊരാ ദിനപത്ര താൾ 

കൺമുന്പിലെത്തിയ്ക്കയെന്നതോർത്ത്   

കള്ളുമണത്തൊരാ വാളയാറി-

ന്നുള്ളം പിടയ്ക്കുന്ന വിങ്ങലായി 

നക്സലായ് തീരുന്നതെന്തേ ചിലർ 

ഉത്തരം കിട്ടാനെളുപ്പമായി 

സ്കൂളിൽ നിന്നങ്ങു മടങ്ങും വഴി 

ഓടിയടുത്തിട്ടു വേട്ടനായ്ക്കൾ  

പച്ചയ്ക്ക് തിന്നു മദിച്ചു പോലും 

കൗമാരക്കാരിയാം ഇരയൊന്നിനെ 

മദ്യത്തിനായ് തുക നൽകിടാത്തോ- 

രമ്മയെ കാലന്നു നൽകീടുവാൻ 

ഒട്ടും മടിയ്ക്കാത്ത മക്കളാലെ 

സമ്പന്നമാകുന്നു കേരനാട് !

മുക്കിന്നു ബാറുകൾ നൽകിയിട്ടാ- 

മന്ത്രിയിന്നോതിയതു കേട്ടുവോ നീ?

"നിരോധനം കൊണ്ടൊരു കാര്യമില്ല, 

വർജ്ജനമാണിന്നു പഥ്യ"മത്രേ !

പാടവും തോടും നികത്തി നമ്മൾ 
പകരമായ് ചെയ്തോരു വേല കണ്ടോ?
റോഡായ റോഡിൽ കുളങ്ങൾ തീർത്തു 
നാളെയതിൽ മീനും വളർത്തിടാത്രെ !!

*എഫ്ബിയും **ടിടിയും സ്വപ്നമാക്കി 

ലൈക്കിന്റെയൊപ്പം ഒളിച്ചോടുവാൻ 

വെമ്പിനിൽക്കുന്നവരായി മാറി 

തുച്ഛമല്ലാതെണ്ണം ഇവിടെ ചിലർ !!

ആവില്ല വീണ്ടും തിരിച്ചു പോകാൻ 

ആ നല്ല നാളിലേയ്ക്കൊരു മാത്രയും 

എങ്കിലും, ആവില്ലേ ഒത്തുചേർന്നാൽ 

ഇനിയങ്ങു, മോശമാവാതിരിയ്ക്കാൻ ?

- ബിനു മോനിപ്പള്ളി

*************

Blog: https://binumonippally.blogspot.com

ചിത്രത്തിന് കടപ്പാട് : ഗൂഗിൾ ഇമേജസ് 

*ഫേസ്ബുക് 
**ടിക്‌ടോക്