... ന്നാലും ന്റെ അന്തോണിച്ചാ ....! ['ഷേക്ക് ഹാൻഡ്' സംഭവകഥ]
... ന്നാലും ന്റെ അന്തോണിച്ചാ ....!
[ഒരൊന്നൊന്നര 'ഷേക്ക് ഹാൻഡ്' സംഭവകഥ]
മ്മടെ ഓണം ഒക്കെ അങ്ങട് തീർന്ന് സ്വസ്ഥായി ഇരിക്കുമ്പഴാ, കൂട്ടത്തിലെ ഒരു ക്ടാവിന്റെ കല്യാണം വരണതേ ...
ശ്ശി നാളായല്ലോ എല്ലാരേം കണ്ടിട്ട് എന്ന് കരുതി പോയി.... എല്ലാരേം കൂട്ടി അങ്ങട്ട് ... അതിപ്പം ഇങ്ങനൊക്കെ ആവൂന്ന് നോം അങ്ങട്ട് കരുതീമില്ല .... ഇമ്മാതിരി ഒരു തട്ട് നിനച്ചൂല്ല .... കലികാലം ... ല്ലാതെന്താ?... ങ് അത് പോട്ടെ ...
എന്റെ ഗഡിയെ ... ഇപ്പഴത്തെ ഒക്കെ ഒരു കല്യാണത്തലേന്ന് ... എന്തോരു മേളാപ്പാ ... ഈ ന്യൂജൻ പിള്ളേര് ആകെക്കൂടി കലിപ്പാ കേട്ടാ ... എല്ലാം പൊളപ്പന്മാര് .... പൊളപ്പത്തിമാര് .. ഹോ ... എന്താ ഒരു എനർജി .... ആകെ കൂടി ഒരു ബഹളമയം .... എന്ന് വെച്ചാ ഒരു 4D എഫ്ഫക്റ് .....
സത്യം പറയാല്ലോ .... നുമ്മ ആകെ അങ്ങ് സ്റ്റണ്ട് ആയിപ്പോയീന്നെ ....
ശരിയ്ക്കും പറഞ്ഞാ ...എന്റെ ബ്രോ .... ഇതൊക്കെ കണ്ടപ്പം, പണ്ട് നമ്മടെ ആ കല്യാണത്തലേന്നത്തെ പരിപാടി ഒക്കെ അറേഞ്ച് ചെയ്തോമ്മാരെ എല്ലാത്തിനേം ഓടിച്ചു പിടിച്ചു ദേ ഈ കെണറ്റിലിടാൻ തോന്നി .... വെറും ശവികള് .... അല്ല പിന്നെ ....
അങ്ങനെ, നമ്മൾ ആ പരിപാടികളും, ദലേർ ഇല്ലാത്ത മെഹന്ദീം, ഗാനമേളേം, കലാപക്കാരേം ഒക്കെ ആസ്വദിച്ച് രസിച്ചങ്ങനെ നിക്കുമ്പോ ദേ വരുന്നു അങ്ങേതിലെ അന്തോണിച്ചൻ ...
അറിയ്യോ പുള്ളിക്കാരനെ ?
വയസ്സ് ശ്ശി ആയെങ്കിലും ആളിപ്പളും ഒരു ഒന്നൊന്നര ആളാണ് ട്ടാ ... വേണേൽ ഒരു പഞ്ചഗുസ്തി മത്സരത്തിന് ഇനിയും ഇത്തിരി ബാല്യം ബാക്കി .... ഇനീപ്പം അത് വേണ്ട നിങ്ങക്ക് ഗാട്ടാ ഗുസ്തി വേണോ? ഓ... അതിനും തയ്യാർ എന്ന മട്ട്....
വന്ന വഴി, ആള് പന്തലിൽ എല്ലാരേം ഒന്ന് നോക്കി... 'ആരടാ വീരാ പോരിന് വാടാ' എന്ന ആ സ്ഥിരം മട്ടിൽ....
അപ്പൊ ദേ .... അകത്തെ മുറീൽ ഒരാൾ ഇരിയ്ക്കുന്നു .... ആരാ ?
അല്ല .... ആരാ?
നുമ്മടെ കളിക്കൂട്ടുകാരി പൊന്നമ്മ ....
"എടിയേ പൊന്നമ്മേ ...." എന്നൊരു വിളീം .... അകത്തേയ്ക്കൊരു ഓട്ടോം ....
കുറേ വർഷങ്ങൾ കൂടിയാ തമ്മിൽ കാണണതെ ... അതിന്റെ ഒരു സന്തോഷാരുന്നു ...
കൊടുത്തു നീട്ടിപ്പിടിച്ചൊരു ഉഗ്രൻ ഷേക്ക് ഹാൻഡ് ....
അന്തോണിച്ചന്റെയോ പൊന്നമ്മേടെയോ (അതോ കണ്ടു നിന്ന നാണിയമ്മേടെയോ) നെഞ്ചിടിപ്പാണോ എന്തോ.... 'ടക്' ന്ന് കേട്ടുട്ടോ ഒരു സൗണ്ട് ... കൂടെ "അയ്യോ" എന്ന പൊന്നമ്മേടെ നിലവിളീം ...
പാടത്ത് ഞാറ് നട്ടപോലെ മുറ്റം മുഴുവൻ നിരത്തിയ ആ എമണ്ടൻ സ്പീക്കറുകളിൽ "കാവാലയ്യ....." ആഞ്ഞു തകർക്കുമ്പോൾ, ഒരു പഴയ സിലോൺ റേഡിയോയിൽ നിന്നും വന്ന ആ "അയ്യോ" ആര് കേൾക്കാൻ ... ഇനിയിപ്പം ആരേലും കേട്ടാൽ തന്നെ, അത് മ്മടെ അനിരുദ്ധ് ഗഡീടെ എന്തേലും പൊളപ്പൻ മ്യൂസിക് ട്രിക് ആകും എന്ന് കരുതുകേം ചെയ്യും .... ല്ലേ?
എന്തായാലും ഒന്ന് ഞെട്ടിയ അന്തോണിച്ചൻ കൂട്ടിപ്പിടിച്ച കൈ ശടേന്ന് തുറന്നു ... ദാ കെടക്കണ് ... അതിനകത്തൊരു വമ്പൻ താക്കോൽക്കൂട്ടം ... കണ്ടിട്ട് ഒരു അറനിര പകിട്ട്...
പ്പം ... കാര്യം പുടി കിട്ടീലോ?
എന്തായാലും നേരം വെളുത്തു, കല്യാണോം കൂടി ...നമ്മ വന്ന വഴി മടങ്ങി ...പൊന്നമ്മേം കൂട്ടി....
ചെറുതായി നീര് വച്ച വിരലിൽ നമ്മടെ ചില നാട്ട് മരുന്നും ചില്ലറ ക്രീമും ഒക്കെ പുരട്ടി നമ്മള് ആ പ്രശ്നങ്ങ് സോൾവാക്കിന്നേ ...
പക്ഷേല് ..പിടിച്ചത് പഞ്ചഗുസ്തി അന്തോണിച്ചനല്ലാർന്നോ ? അതോർക്കണ്ടേ ..? ഓർത്തില്ല ...
പിറ്റേന്നായപ്പം ചെറുവിരൽ ദാ കരിനീലക്കളറിൽ ... മുട്ടൻ മാക്കാനെ വിഴുങ്ങിയ നീർക്കോലിയെ പോലെ....
നേരെ വച്ച് പിടിച്ച് അടുത്ത മെഡിക്ക കാളജിലേയ്ക്ക് ... ചീട്ടുമെടുത്ത് നേരെ അത്യാഹിതത്തിൽ ... പാഞ്ഞെത്തിയ ഡോക്ടർ കാര്യം തിരക്കി ....നമ്മള് കാര്യം പറഞ്ഞു ...
".... ആ വിരൽ ആകെ നീര് വച്ച്..."
"എന്ത് പറ്റി ?" അത്യാഹിത വിഭാഗത്തിന്റെ എല്ലാ ഗൗരവവും നിറച്ചാണ് ചോദ്യം.
"അത് പിന്നെ ..."
"പിന്നെ ..?"
"ഒരു ഷേക്ക് ഹാൻഡ് ...."
"ഏ... ഷേക്ക് ഹാൻഡോ ?"
പിന്നെ ഒന്നും നോക്കീല്ല ... മ്മളാ കാര്യങ്ങട്ട് വിശദായി പറഞ്ഞു ...
കേട്ടതും ഡോക്ടറും കൂടെ ഉള്ള നേഴ്സ് മാരും ഒക്കെ ഒരു നിമിഷം നിശബ്ദരായി ....
പറഞ്ഞത് പ്രശ്നായോ കർത്താവേ ... എന്നു കരുതി നമ്മള് ചുറ്റും നോക്കി ... അപ്പം ദേ അടുത്ത ബെഡ്ഡിലൊക്കെയുള്ള മറ്റു രോഗികളുടെ കൂടെ ഉള്ളവരും ആകെ മൊത്തം നിശബ്ദർ ...
അത്യാഹിത വിഭാഗം, നമ്മടെ പഴയ കണക്ക് മാഷിന്റെ ക്ളാസ് പോലെ സമ്പൂർണ്ണ നിശബ്ദം...
പ്രശ്നായി ...പ്രശ്നായി .... ആകെ പ്രശ്നായി.... നമ്മള് തീർച്ചപ്പെടുത്തി.
ഇനീപ്പം എന്താ ചെയ്ക എന്നാലോചിച്ചപ്പോ അറിയാകെ ഒന്ന് കണ്ണടച്ചു പോയി ... അതാണല്ലോ അയിന്റെ ഒരു സ്റ്റൈല് ...
അപ്പളല്ലേ ...
എല്ലാരും കൂടെ ഒറ്റച്ചിരി .... അതും ഉറക്കെ ....
അല്ല ... അതിപ്പം .... അത്യാഹിതമല്ല എന്ത് ഹിതമായാലും ശരി... ചിരിച്ചു പോകില്ലേ ..?
ആദ്യമായാണത്രെ ഷേക്ക് ഹാൻഡ് കൊടുത്തതിന് ഒരു രോഗിയെ അവിടെ അത്യാഹിതത്തിൽ കൊണ്ട് വരുന്നേ ...
അപൂർവ്വ സ്പെസിമനെ ....
അന്തോണിച്ച ... നിങ്ങളെ സമ്മതിച്ചിരിയ്ക്കുന്നു ....
അവിടെന്ന് നേരെ 'ഓർത്തോ'യിലേയ്ക്ക് .... അവിടെ ചെന്നപ്പം ദാണ്ടെ ഒരു പെരുന്നാളിന്റെ തിരക്ക് ... എന്നാലും മ്മ്ടെ രോഗിടെ ഒരു അവശത കണ്ടത് കൊണ്ടാകണം ഡോക്ടർ അകത്തേയ്ക്ക് വിളിച്ചു ...
അകത്ത് ഡോക്ടർ മാത്രമല്ല, ചുറ്റിലുമായി കുറെയേറെ കുഞ്ഞൻ ഡോക്ടർമാരും കുഞ്ഞി ഡോക്ടർമാരും.... വൈദ്യം പഠിയ്ക്കുന്നോരാത്രെ ...
കുഞ്ഞന്മാരോടും കുഞ്ഞികളോടും മനുഷ്യ ശരീരത്തിലെ ചെറിയ വലിയ എല്ലുകളെ കുറിച്ചും, അവർ ഉണ്ടാക്കുന്ന ആ ഗുലുമാലുകളെ പറ്റിയും, പിന്നെ 'ഓർത്തോ'ക്കാരായ നമ്മൾ അതൊക്കെ സോൾവ് ആക്കേണ്ട വഴികളേയും കുറുക്കുവഴികളേയും ഒക്കെ പറ്റിയും, കട്ട ഗൗരവത്തിൽ പറഞ്ഞു കൊടുക്കുന്നതിനിടയിൽ ആണ് ഡോക്ടർ ഞങ്ങളെ വിളിച്ചത് ...
ഏതോ നിർഭാഗ്യവാൻ കുഞ്ഞൻ, വല്യ ഡോക്ടർ ചോദിച്ച ചോദ്യത്തിന് ... ക്ക ..മ്മ...ഞ്ഞ... ഉത്തരത്തിനു തപ്പുമ്പോഴാ ഞങ്ങൾ ചെന്നതേ ...
അത്യാഹിതത്തിനേക്കാൾ വലിയ ഗൗരവത്തിലായിരുന്നു "മ്മ് ... എന്താ പറ്റിയെ ?" എന്ന ഡോക്ടറുടെ ചോദ്യം ...
"ഷേക്ക് ഹാൻഡ്" എന്ന് കേട്ടതും, ദേ അവിടേം നിശബ്ദത .... പിന്നെയോ ?
എന്ത് പിന്നെ?
കാര്യം കേട്ടതും വായും പൊത്തി ഡോക്ടർ ഒരു ചിരിയാരുന്നു ...
ഇത്രേം നാളായിട്ടും വല്യ ഡോക്ടർ ഇങ്ങിനെ ഒന്ന് ചിരിച്ചു കാണാത്ത കുഞ്ഞന്മാരും കുഞ്ഞികളും ഒച്ച കേൾപ്പിക്കാതെ ആർത്തു ചിരിച്ചു ...
ഇതൊക്കെ കണ്ടാ, മ്മടെ പേഷ്യന്റ് നു ചിരിയ്ക്കാതിരിയ്ക്കാൻ പറ്റോ ... മ്മടെ പൊന്നമ്മേം ചിരിച്ചു ... അപ്പൊ പിന്നെ ഞങ്ങളും ചിരിച്ചു ...
ഓർത്തോല് ... ആകെ മൊത്തം ചിരി .... ഓർക്കുമ്പം ദേ ഇപ്പോഴും ചിരി...
എന്തിനേറെ പറയുന്നു ... ഓർത്തോന്നു നേരെ എക്സ് റെയ്ക്ക്.... അവിടെന്നു പ്ലാസ്റ്റർ ഇടാൻ ... എല്ലാടത്തും ചിരിയോ ചിരി ....
ഒരു മെഡിക്കൽ കോളേജിൽ കയറി, അവിടെ അത്യാഹിതത്തിൽ ഉൾപ്പെടെ ഇത്രേം പേരെ ഒറ്റയടിയ്ക്ക് ചിരിപ്പിച്ച രോഗിയ്ക്ക് വല്ല 'പദ്മ ചിരി' അവാർഡും ഒണ്ടാരുന്നേ, അന്തോണിച്ചന്റെ ആ കർത്താവാണേ സത്യം, അത് ഒരു കോമ്പറ്റിഷനും ഇല്ലാതെ മ്മടെ പൊന്നമ്മ ചാടി വാങ്ങി കക്ഷത്ത് വച്ചേനെ ....
അതുമല്ല .... മ്മ്ടെ ലാലു അച്ചായന്റെ സ്റൈലീ പറഞ്ഞാ ..."ലക്ഷത്തീ ഒരാൾക്ക് മാത്രം കൈവരുന്ന ആ മഹാഭാഗ്യല്ലേ ..." ചുമ്മാ ഒരു കല്യാണ വീട്ടീന്ന് പുട്ടുപോലെ നമ്മടെ പൊന്നമ്മ അടിച്ചു മാറ്റീത് ....
അതോണ്ടെന്നാ? ഓണം ബമ്പറാ വഴിമാറി അങ്ങ് തമിഴ് നാട്ടിലോട്ട് പോയത് ....
ഒടിഞ്ഞത് ചെറുവിരലാണെങ്കിലും, ഇളകാതിരിയ്ക്കാൻ കൈമുട്ടിനു താഴേയ്ക്ക് മൊത്തം പ്ലാസ്റ്റർ ഇട്ട പൊന്നമ്മേം കൊണ്ടു നമ്മ നേരെ വീടെത്തി ....
ഇവിടെ തീർന്നോ?
ഇല്ലന്നെ ...ഒരാഴ്ച കഴിഞ്ഞു ചെല്ലാൻ പറഞ്ഞപോലെ ഞങ്ങ ഇന്നലെ പിന്നേം ചെന്നു ....
ഓർത്തോയിൽ അടുക്കാൻ പറ്റാത്തത്ര ആള് ... പക്ഷേ, ആരേം നോക്കാതെ വല്യ ഡോക്ടർ നേരെ എണീറ്റ് നമ്മടെ അടുത്തേയ്ക്കു വന്ന് ... "ആഹാ ... ഷേക്ക് ഹാൻഡല്ലേ..? വാ...വാ" എന്നൊരു വിളി.
ക്യു ഒക്കെ തെറ്റിച്ചു മ്മടെ പൊന്നമ്മ ഡോക്ടറിനേം കണ്ട്, പിന്നെ പ്ളാസ്റ്റർ വെട്ടാൻ പോയി ... ദേ അവിടേം വി ഐ പി സ്വീകരണം .... "ഷേക്ക് ഹാൻഡല്ലേ..? വായോ... വായോ" ...
എക്സ് റെയിൽ ആണേലോ ? അതിനേക്കാൾ വല്യ പ്രയോറിറ്റി ... "ഷേക്ക് ഹാൻഡല്ലേ..? വായോ... വായോ.... വായോ" ...
ആഹാ .. മ്മ്ടെ പൊന്നമ്മയ്ക്ക് ആണെങ്കി ആദ്യമായി 1000 കോടി ക്ലബിൽ കേറിയ ഗമ.....
കഥയറിയാതെ ആട്ടം കണ്ട മറ്റു രോഗികളാകട്ടെ, മ്മ്ടെ പൊന്നമ്മ ഏതോ വി വി ഐ പി ആണ് കരുതി, ക്യു തെറ്റിച്ചിട്ടും ഒന്നും മിണ്ടാതെ നിന്നു ....
ഹോ... എന്നാലും ന്റെ അന്തോണിച്ചാ ഒരൊറ്റ ഷേക്ക് ഹാൻഡിൽ ഇത്രേം ഒക്കെ മാറ്റിമറിച്ച നീയേ.... നീയൊരു പ്രസ്ഥാനം തന്നടെ ... അതിന് നുമ്മ വക നിനക്കൊരു കുതിരപ്പവൻ ... ചുമ്മാ കെടക്കട്ടേന്ന് ....
പക്ഷേങ്കില് ...
ഇമ്മാതിരി ചെയ്ത് ... അത് ഇനി ആരോടും ചെയ്തേക്കല്ലേ എന്റെ പൊന്നേ ....
***********
പിന്നാമ്പുറം: ഇതിപ്പം ആ ഷേക്ക് ഹാൻഡിന് ഞങ്ങൾ ദൃക്സാക്ഷികൾ ആയതോണ്ട് കൊള്ളാം. മുക്കിന് മുക്കിന് പൂർവ്വ വിദ്യാർത്ഥിസംഗമോം പിന്നെ വാട്സാപ്പ് ഗ്രൂപ്പും ചാറ്റും, (ശേഷം അസാരം ചീറ്റിംഗും) ഒക്കെ നടക്കണ കാലാ .... 'ഒറ്റപ്പിടുത്തത്തിന് ഇത്രേം ശക്തീ പിടിയ്ക്കണോങ്കി അതെന്നാ ഒരു പിടിയാന്നെ ..? അപ്പൊ അതിനെന്നാ കാര്യാന്നെ? " എന്നൊക്കെ ഉള്ള ഒരു വല്ലാത്ത ജാതി സംശയോം, പിന്നെ അതുമായി ചേർന്ന് ഒരു കൊസ്രാക്കൊള്ളി വഴക്കും ഒക്കെ നടക്കാൻ ഇത്രേം തന്നെ ധാരാളാ .... മ്മള് മലയാളികൾക്ക് .... അതോണ്ടാ ഈ കാര്യം ഇങ്ങനെ നീട്ടിപ്പറഞ്ഞെ .... അല്ലാതെ ഇപ്പം, വേറൊന്നും അല്ലാട്ടോടാവേ .... കൂട്ടത്തി ഒരു ചെറിയ കാര്യോം കൂടെ ... ഈ സംഗതി സത്യത്തി ശരിയ്ക്കും സംഭവിച്ചതാണേലും, ആ പേരൊക്കെ ഒന്ന് മാറ്റിപ്പിടിച്ചു കേട്ടോ ...പിന്നെ ഇത്തിരി ദേശാന്തരങ്ങളും ഒന്നങ്ങട് മാറ്റിയെ ... മ്മ്ടെ ആ പൊന്നമ്മയ്ക്കും പിന്നെ 'പാവം' പിടിച്ച ആ അന്തോണിച്ചനും നുമ്മ കാരണം ഇതോണ്ട് ഒരു പേരുദോഷം വരാൻ പാടില്ലാലോ .... അല്ല ..അങ്ങനല്ലേ ...? പക്ഷേങ്കില് .... ന്നാലും ...ന്റെ അന്തോണിച്ചാ ......!!
===============
സ്നേഹപൂർവ്വം
- ബിനു മോനിപ്പള്ളി
******
Blog: www.binumonippally.blogspot.com
Youtube: Binu M P
FB: Binu Mp Binu Monippally
********
മൊത്തത്തിൽ ഒരു അടിപൊളി സംഭവം ... ജോണേർ പറ്റെ മാറ്റിപിടിച്ചതു വളരെ നന്നായി .. പല സംഗതികളും സമകാലിക സംഭവങ്ങളുമായി ബന്ധിപ്പിച്ചിരിക്കുന്നതു ഒരു നല്ല പുതുമ ആയി തോന്നി.. കലക്കി ..
ReplyDeleteഒരുപാട് നന്ദി ... ദൗലത്തെ .... ആ .. സ്ഥിരം കഥാരീതി ഒന്ന് മാറ്റിപ്പിടിച്ചതാ .. അതുമല്ല ഇത് നടന്ന സംഭവമായതു കൊണ്ടും, വിരൽ ഒടിഞ്ഞതിൽ ചിരി ഇല്ലാത്തതു കൊണ്ടും (ചിരി, സംഭവം കേൾക്കുന്നവർക്കും കണ്ടവർക്കും മാത്രമായത് കൊണ്ടും) ഇതാകും നല്ലത് എന്ന് തോന്നി ....
Deleteഎന്റെ പൊന്നെ ഇത് കുറച്ചു ദിവസം മുൻപ്... Ketta കഥയുമായി എവിടെയൊക്കെയോ... 🤣🤣🤣...
ReplyDeleteഅതെ ... അടിസ്ഥാന സംഭവം അത് തന്നെ
ReplyDelete❤️❤️❤️❤️❤️
ReplyDelete