വേണ്ടാ നമുക്കിന്നു കപ്പ... {കവിത}

 [മാറുന്നു നാം കേരളീയർ ?]

വേണ്ടാ നമുക്കിന്നു കപ്പ, അയ്യേ

വേണ്ടാ നമുക്കിന്നു കാച്ചിൽ

ചേമ്പെന്നു കേട്ടാൽ ചൊറിയും, അപ്പോൾ

ചേമ്പിന്റെ താളെന്തു ചെയ്യും ?

ശമ്പളം വാങ്ങുന്നോരല്ലോ, നമ്മൾ

കുമ്പളം നട്ടു വളർത്തുവോ ?

ഇഞ്ചി മിഠായിയെ പോലും, വെറും

നഞ്ചായി കാണുന്നോരല്ലോ !

ചക്കപ്പുഴുക്കെന്നു കേട്ടാൽ, അയ്യേ

നാണം കൊള്ളുന്നോർ നമ്മൾ

സായിപ്പു ചൊല്ലി "ജാക്ഫ്രൂട്ട്", ആഹാ

പാക്കറ്റിൽ വന്നപ്പോൾ സ്വാദോ ?

കൂവക്കിഴങ്ങാർക്കു വേണം, ആ

പര്യമ്പുറത്തെങ്ങാൻ പോട്ടെ

ആരോ പറിച്ചതു, പിന്നെ

പാക്കറ്റിലെത്തിച്ചു പേരോ

'ആരോറൂട്ട്' എന്നു നാം കേട്ടു, സൂപ്പർ-

മാർക്കറ്റിൽ സ്റ്റോക്കെല്ലാം തീർന്നു !

ചക്കിലിട്ടാട്ടിയോരെണ്ണ, കേര-

നാടിന്റെ സ്വന്തമാണെന്നാൽ

ആരോ പറഞ്ഞു 'കൊളസ്‌ട്രോൾ', നമ്മൾ

പോയി  പനയെണ്ണ തേടി !

ഉള്ളി ചതച്ചിട്ട കഞ്ഞി, ഉപ്പു-

മാങ്ങ ഞെരടി കഴിച്ചോർ

കാലത്തെണീറ്റവരിന്നോ, 'കോൺ-

ഫ്‌ളേക്‌സാ'ണു തീറ്റയറിഞ്ഞോ ?

കുത്തരിച്ചോറിന്റെ കൂടെ, ഒരു

മത്തി വറുത്തതും കൂട്ടി

മൃഷ്ടാന്നമുണ്ടവർ നമ്മൾ, ഇന്നു

'നൂഡിൽസ്' തിന്നുന്നോരായി !

കൂണു പോലെങ്ങും മുളച്ചു, നാട്ടിൽ

'ഫാസ്റ്റ്ഫുഡ്' വിൽക്കും കടകൾ

കറുകറുത്തെണ്ണയിൽ കോരി, നമ്മൾ

കറുമുറെ തിന്നേറെ ചിക്കൻ !

നഗരത്തിലെങ്ങും നിറഞ്ഞു, പിന്നെ

നാട്ടിൻ പുറത്തും തുറന്നു

ബേക്കറി എന്നുള്ള പേരിൽ, നിറ-

ഭക്ഷണശാലകളെങ്ങും !

വീട്ടിലെ പാചകം നിർത്തി, നമ്മൾ

'ഔട്ടിങ്' ശീലമായ് മാറ്റി

മാസം മുടങ്ങാതെയിപ്പോൾ, നക്ഷത്ര

ഹോസ്പിറ്റൽ കാണാൻ തുടങ്ങി !

ചിന്തിക്കണം നമ്മൾ, ഇന്നേ

ഇല്ല സമയം കളവാൻ

ഭക്ഷണക്കാര്യത്തിലിന്നേ, നമ്മൾ

പോകണം ആരോഗ്യ മാർഗ്ഗേ ....!

മാറണം  നാം കേരളീയർ, തീർച്ച

മാറ്റങ്ങൾ നമുക്കും വേണം, പക്ഷേ

ആ മാറ്റങ്ങളിങ്ങനെ വേണോ?

ചിന്തിക്കണം നമ്മൾ ഇന്നേ ...!!

                                           -ബിനു മോനിപ്പള്ളി

*********

Blog: https://binumonippally.blogspot.com

ചിത്രങ്ങൾക്ക് കടപ്പാട്: ഗൂഗിൾ ഇമേജസ്
*********

ആലാപനം: ശ്രീ ഞെരളത്ത് ഹരിഗോവിന്ദൻ

video versions also at :

https://www.facebook.com/binu.mp.5/videos/1150848385046283/

https://www.youtube.com/watch?v=w0hdu7SJIIs&feature=youtu.be

***************

അതോടൊപ്പം, ഈ കവിതയെ തന്റെ നാടകത്തിൽ ഉൾപ്പെടുത്തിയ ശ്രീ ജയൻ തച്ചമ്പാറയോടുള്ള നന്ദി ഇവിടെ രേഖപ്പെടുത്തുന്നു