പ്രളയകാലത്തെ തിരിച്ചറിവുകൾ [കവിത]
പ്രളയകാലത്തെ തിരിച്ചറിവുകൾ [കവിത]
പണ്ടവർ *പാടത്ത് ഞാറു നട്ടു
ഇന്നു നാം പാടത്ത് ഫ്ലാറ്റ് നട്ടു
പണ്ടവർ നാട്ടിൽ കുളങ്ങൾ തീർത്തു
ഇന്നു നാം നാടു കുളം തോണ്ടുവോർ !
**കുതിരാന്റെ മുകളിലും വെറുതെ
കുതിര കേറുന്നവർ നമ്മൾ
ആ, ഹൃദയം തുളച്ചിട്ടു രണ്ടു-
'ബൈപ്പാസ്' പണിയുവോർ നമ്മൾ !
ഫലവൃക്ഷ പക്ഷി മൃഗാദികളെ
കാക്കുവാൻ പണ്ടവർ കാവ് തീർത്തു
അന്ധവിശ്വാസമെന്നാർത്തു ചൊല്ലീ
നമ്മളാ കാവുകൾ വെട്ടി നീർത്തി !
മലദൈവമുണ്ടെന്നു ചൊല്ലിയവർ
മലകളെ പൊന്നുപോൽ കാത്തു വച്ചു
മലദൈവമില്ലെന്നു തെളിയിയ്ക്കുവാൻ
മലകളിടിച്ചു നാം യന്ത്രത്തിനാൽ !
തെളിനീരൊഴുകുവാൻ തോടു തീർത്തു
നാടിന്റെ നാഡീ ഞരമ്പു പോലെ
തോടൊരു വേസ്റ്റെന്നു ചൊല്ലി നമ്മൾ
തോടു മൂടി കുഴൽ കിണറു തീർത്തു !
തൂശനിലയിൽ അവർ കഴിച്ചു
ഇല പിന്നെ മണ്ണിൽ കുഴിച്ചു മൂടി
പ്ലാസ്റ്റിക് പ്ലേറ്റുകൾ നാം നിരത്തി
അവ പിന്നെ ദൂരെ വലിച്ചെറിഞ്ഞു !
തൂശനിലയിൽ അവർ കഴിച്ചു
ഇല പിന്നെ മണ്ണിൽ കുഴിച്ചു മൂടി
പ്ലാസ്റ്റിക് പ്ലേറ്റുകൾ നാം നിരത്തി
അവ പിന്നെ ദൂരെ വലിച്ചെറിഞ്ഞു !
അതിരുകൾ തമ്മിൽ തിരിച്ചീടുവാൻ
അവരു കുത്തി ***ശീമ, ചെമ്പരത്തീം
വേരോടെയവ നമ്മൾ പിഴുതെറിഞ്ഞു
ആറടിപ്പൊക്കത്തിൽ മതിലു തീർത്തു !
വീടിൻ വിളക്കു പോൽ കാത്തിരുന്നു
നടുമുറ്റമൊന്നവർ വൃത്തിയായി
വൃത്തി പോരാഞ്ഞതിനെന്ന പോലെ
നമ്മളതു 'ടൈലി'ട്ടു മോടി കൂട്ടി !
ആറും പുഴകളും തോടുകളും,
നീളെ പരന്ന നിളാ നദിയും
നിർബാധമൊഴുകിയ നാട് പണ്ട്,
കായൽ പരപ്പിന്റെ കുട്ടനാടും !
നീലജലാശയ കൂട്ടങ്ങളും, കൂടെ
കളകളമുരുവിട്ടൊരരുവികളും
കൂമൻ വസിച്ചോരു കാനനവും
നീളെ നിറഞ്ഞൊരാ കേര നാട് !
പുഴയിലെ മണലൂറ്റി തീർത്തു നമ്മൾ
പിന്നെ, പാറ പൊട്ടിച്ചു പൊടിച്ചു നമ്മൾ
പുഴയുടെ കര കാർന്നു തീർത്തു നമ്മൾ
'പുഴ കാണും വില്ലകൾ' നിരനിരയായ് !
വരയാട് മേഞ്ഞൊരാ മലനിരയിൽ
മാല പോൽ തീർത്തു 'റിസോർട്ട്' നമ്മൾ
'ടൂറിസ'മെന്നുള്ള പേരു ചൊല്ലി
തോന്ന്യാസമല്ലേ നടത്തി നമ്മൾ !
കലികാലമെന്നു നാം ഓർത്തതില്ല
കലി തുള്ളാം കാലമെന്നോർത്തതില്ല
വരുണന്റെ കോപം ചെറുത്തീടുവാൻ, ചെറു-
തടയണ തീർത്തൊരു മൂഡർ നമ്മൾ !
പകയുണ്ട് പ്രകൃതിയ്ക്കതോർക്ക വേണം
പകയുണ്ട് പുഴകൾക്കുമോർക്ക വേണം
പക തൻ ഉരുളുകൾ ഗർഭമേറ്റി
കലി പൂണ്ടു നിൽക്കയാണോർക്ക വേണം !!
അമ്മയായ് ഭൂമിയെ കണ്ടിടുന്നോർ
ആ, നെഞ്ചകം കീറി പിളർന്നെടുക്കേ
അതിരുണ്ട് അമ്മ തൻ സഹനത്തിനും
അറിയാതെ പോകരുതിനിയെങ്കിലും !
രമ്യഹർമ്മ്യത്തിലുറങ്ങിയോർ നാം
രാവു വെളുക്കവേ 'ക്യാമ്പി'ലായി
ലക്ഷങ്ങൾ ബാങ്കിൽ കിടക്കുവോരും
അന്നം തിരഞ്ഞന്നു ദൈന്യരായി !
വേണം വികസനം നാടിതിന്നും
വേണം വ്യവസായ ശാലകളും
എന്നാൽ ....
ഒന്നുമീ നാടിന്നു ഹാനിയാകാ-
തൊട്ടു കരുതലോടാക വേണം
നമ്മളീ ദുരിതം കടന്നു പോകും
ഒരുമിച്ചു നമ്മൾ കര കയറും
ഒരുമയോടിനിയും നാം ഒത്തു ചേർന്നാൽ
സുന്ദര കേരളം പണിതുയർത്താം ....!!
--ബിനു മോനിപ്പള്ളി
*വയൽ
**കുതിരാൻ മല
**കുതിരാൻ മല
***ശീമക്കൊന്ന
****************************
Blog: https://binumonippally.blogspot.com
ചിത്രങ്ങൾക്ക് കടപ്പാട്: ഗൂഗിൾ ഇമേജസ്
Comments
Post a Comment