'മഴയാണെനിയ്ക്കെന്നുമിഷ്ടം...' : [Valentine's Day Special -2025]

 

 'മഴയാണെനിയ്ക്കെന്നുമിഷ്ടം...'

[ലളിതഗാനം]

മഴയുടെ കൂടെ വന്നെൻ കാതിലോതി നീ 

'മഴയാണെനിയ്ക്കെന്നുമിഷ്ടം...'

മഴയത്ത് ഞാൻ നിന്നെ അകതാരിലോർത്തുകൊണ്ടി-

റയത്ത് മിഴി പാകി നിൽക്കേ 

മഴയുടെ കൂടെ വന്നെൻ കാതിലോതി നീ 

'മഴയാണെനിയ്ക്കെന്നുമിഷ്ടം...'

                                                  [മഴയുടെ കൂടെ വന്നെൻ കാതിലോതി നീ ]

അരികത്തിരുത്തി നിൻ അളകങ്ങഴകോടെ 

വിരലുകൾ  കൊണ്ടുഞാൻ കോതി നീർത്തേ 

മഴയുടെ നൂലുകൾ ഒരു സ്‌നിഗ്ധരാഗത്തിൻ 

മർമ്മരമുള്ളിലുണർത്തിയില്ലേ, അതിൽ 

നമ്മളലിഞ്ഞങ്ങു ചേർന്നതില്ലേ  

                                                  [മഴയുടെ കൂടെ വന്നെൻ കാതിലോതി നീ ]

കഥയില്ലാകഥകൾ നാം വെറുതേ മൊഴിഞ്ഞപ്പോൾ 

കെറുവോടെ നിന്നൊരാ മഴത്തുള്ളികൾ 

ഇനിയൊരു മഴയായി നിൻ മിഴി പെയ്തപ്പോൾ 

നൊമ്പരമോടെ ഞാൻ നിന്നതില്ലേ, നിന്നെ 

ചേർത്തു ഞാൻ പാടിയതോർമ്മയില്ലേ

                                                  [മഴയുടെ കൂടെ വന്നെൻ കാതിലോതി നീ ]

പിൻകുറിപ്പ്: ചെമ്പനീർ മൊട്ടുകളെ മുത്തമിട്ടുണർത്തുവാൻ, മഞ്ഞുത്തുള്ളികൾ വെമ്പിനിൽക്കുമ്പോൾ.... സ്നിഗ്ധമായുണരുന്ന ആ പ്രണയത്തിനും.... പിന്നെ, പ്രണയം ഒരു മുത്തുപോലെ മനസ്സിൽ സൂക്ഷിയ്ക്കുന്നവർക്കും ...! വാലൻന്റൈൻ സ്പെഷ്യൽ!!

=================

സ്നേഹപൂർവ്വം 

ബിനു മോനിപ്പള്ളി 

******

Blog: www.binumonippally.blogspot.com

Youtube: Binu M P

FB: Binu Mp Binu Monippally

********