യദുകുലം [കവിത]

യുഗമതു മുൻപേ ദ്വാപരകാലം 

നാടുഭരിച്ചൊരു യദുവംശം 

ഭഗവാൻ കൃഷ്ണൻ രാജസ്ഥാനേ- 

വാണരുളീടിയ യദുവംശം 

മഥുരാപുരിയെ സ്വർഗ്ഗസമാനം

പരിപാലിച്ചൊരു യദുവംശം 

നാടിനു നന്മകൾ മാത്രം ചെയ്താ- 

നാടു ഭരിച്ചൊരു യദുവംശം 

പതിയെ സുര തൻ വഴിയേ നീങ്ങി 

താനെ നശിച്ചൊരു യദുവംശം 

സുരയിൽ മുങ്ങിയൊരാസുര ചിന്തയിൽ 

അടിവേരിളകിയ യദുവംശം 

മദ്യമതേകിയ മായികവലയം 

ഭൂഷണമാക്കിയ ശാപകുലം 

പാതിമറഞ്ഞൊരു ബോധമനസ്സുകൾ 

താണ്ഡവമാടിയ ശാപകുലം

'ഏരക'വടി തൻ മാരകപ്രഹരം 

പാടെ മുടിച്ചൊരു ശാപകുലം

ഭഗവാൻ പോലും പാടെയുപേക്ഷി-

ച്ചെങ്ങോ പോയൊരു ശാപകുലം

                          * * * *

മാബലി നാടും യദുകുല വഴിയേ 

പോവുകയല്ലേ ചിന്തിക്കൂ 

നാട്ടിൽ മുഴുവൻ മദ്യപരാടും 

പേക്കൂത്തല്ലേ കാണ്മതു നാം !

'ഏരക'വടികൾ ദൂരെയെറിഞ്ഞവർ 

കൊടുവാൾ കൈകളിലേന്തുന്നു

ഗദകൾ മാറ്റി നാടൻ ബോംബിൻ  

ഭാണ്ഡം തോളിൽ തൂക്കുന്നു  

കലിയുഗകാലേ നാടിതു നാശ-

പടുകുഴി പൂകുവതിൻ മുൻപേ 

രക്ഷയുമായൊരു കൽക്കി ഈ നാട്ടിൽ 

ജന്മമെടുക്കാൻ പ്രാർത്ഥിക്കാം !!

*************

binumonippally.blogspot.in

*ചിത്രത്തിന് കടപ്പാട്: Google Images